رائعة إيزيس غانم .. ( شهد روحي )

وقالّى يا صغيره..

قلبك صغير ...حبك صغير ..
فإزاى هغيّر ...مقداف سفينتى
وأرسى بين مينة عينيكى ..؟
إزاى هامد إيديه وأخدك من إيديكى ؟
وأنا حاسس إنى كل عين ..
بتبص مره عليا ..
ومرتين بصّين عليكى ...!
إزاى يا أصغر وردة ف جنينة حياتى ..
أشم وردك..وأبدر الأشواق عليكى ..
وأنا حاسس إن مدافع اللوام ..
محاصرنى لومها ..
كأن عمرى كبير عليكى ...!!

فعودى للعمر المناسب ...
إبعدى شياطين شقاوتك ..
سيبى إيدى من إيديكى ..!
لسّه عمرك ع الخدود..
موجود ..ومش موجود..
لسّه ما كمّلش فيكى ..
خراط صفاتك أحلى عود..
لسه ما لوّنش خدك ..
من كاسات شهد الورود..
فعودى للحلم الصغير ..
وافرشى منديلك الأخضر عليه ..
قولتله طيب وليه..؟
هو إنت عمرك أد إيه..؟
قالّى عمرى ضعف عمرك..ويزيد عليه ..
قولتله ..طب فيها إيه ..؟
قالى لسه بتسألينى ..؟
قولتله مسألش ليه ..؟
الحب عمره ما كان له عمر ..
هتحاسبنى ع العمر ليه ...؟؟
قالّى إسكتى ..كسرتى فيا الرد..
وبكل حب رديت عليه ..
اللى أنكسر فيك إتبنى فيا وعلا ..
فعلّى معمارك عليه ..
لسّه النهار ف عينيك بيضحك ..
تحرمه م الشمس ليه ..؟
خد من ضلوعى شمس وإصنع ..
شمسين لقلبك ...
شمس لما أحبى وأجيلك
ترفعنى ليك ...
والتانيه تعصر شهد روحى
وم العطش ترويك ..!
.................
قصيدة \\ شهد روحى
من ديوانى الثانى ..
إيزيس غانم ...