حضرتك كله تمام..كلمات/ محمود مرعي

لو في نفسك مره تسأل
عن حياتنا باهتمام

تلقي رد سريع و جاهز
حضرتك كله تمام

والحياه بقي لونها بامبي
قول كده ، شط الغرام

الضمير مظبوط وصاحبه
عمره ما يقبل حرام

والطرق واسعة و مريحه
كله ماشي بالنظام

خدها مني يابيه صريحه
حضرتك كله تمام

والبيوت زي القصور
حتي لو كانت خيام

واللي قالك فيه مشاكل
يبقي ده عانده انفصام

دا الجنيه بيه كيلو لحمه
أودجاجه وجوز حمام

أما لو تسأل هقولك
عن بلادنا و العلام

تلقي كل شبابنا طالع
م الأوائل كل عام

وف بلادنا مفيش بطاله
والشباب كله احترام

الوظايف بالزكايب
والحياه آخر انسجام

فيهاأيه لو رحت مشفي
لو سليم جالك زكام

فيها أيه لو تقضي يومك
ف المواصلات و الزحام

فيها أيه لو عدّي عمرك
يله قول، حسن الختام

فيهاأيه لو عشت ساكت
واتحبس فيك الكلام

أما لو نفسك ف حاجه
هتلقيها ف المنام

فيها أيه لو قلت دايما
حضرتك كله تمام