عشان قلبى على الفطره ... معودتوش
يخونك أو يخون غيرك.....
محبتش انه يتلون بلون خدّاع
ولا إنه يعيش كداب ...
ولا حقبل ف يوم إنى يضيع منى
ولو حتى ..... حكمل عمرى من غيرك
قلبى وقلبى يا حبيب قلبى ..متعرفهوش
لأنه من زمن تانى ..
وهاجر ريشه لزمانى ..
ولما سكنّى شالنى لفوق
وعمره ف يوم معرانى
لأنه بنبضه غطانى !!!!!!!!
فشوف قلبى .. وشوف قلبك
يلى معرفتش تشوف غيرك
وعشت ف وادى أصنامك
كأنك نسر متغطى بريش غيرك
ففين ريشك ؟؟
وفين تكوينك العالى؟؟
وفين خوفك على جناحك...
رضيت تلبس هدوم نرجس
وتتنرجس على العصافير وتجرحها
ومش حاسس نزيف الكره ف جراحك!!!
جميل شكلك ..جميل إسمك
لكين ميت جمال روحك!!
فمين موّت جمالك فيك ؟؟!!
وساب ف عنيك بريق لامع
بريق كداب على الرائى وع السامع
ومن خلف البريق جواك
زرع ضلمه ف تكوينك
فعشت بالبريق تعمى عيون حباك
عشان شيفاك من الخارج
ومش قادره تغوص جواك
وتكشف سحر تلوينك ........
لكنى غطست .. جواك وملكت
بصيرة العارف..تخطيتك
وشوفت سواقى أفكارك
لقيت الجنه محروقه....
وبتئن بلهيب نارك !!!!
فسامحنى ..وتسمح أو متسمحشى
لأنى حطير وأسيب نارك...
وحرجع تانى لمكانى مع العصافير
فصنّع من رماد نارك
عروسة عشق تعشقها
لأنك من جحيم النار
والنار..بتحب عشاقها ..
.....................................
قصيدة النار بتحب عشاقها
من ديوانى ((هلع الخوف ))
ليست هناك تعليقات:
إرسال تعليق