الشاعرة القديرة إيزيس غانم تكتب: أول دروس الطير

بحبك ... بس غير كل اللى حبوا
ما ينفعش أكون ليلي ولا ... بلقيس
ومنفعشى أكون غيري
لأن أنا ... غير كل غير ...
ولأن قلبي ... قلب طير
إن حط فوق الأرض يسرق
كل حَب .....
وإن حب ... يعلا في السما للطير
قلبي غارة ... وإن غار عليك
حتسّلم حصونك ...
وتكسّر دروعك ...
وتسلملي قلبك ...
وتبقى أضعف طير ...
فبلاش تحاول بين سمايا تطير
وإن طرت حاذر ... حاذر
من فنون الطير ...
لأن طيري غير أي طير ...
طيري ياخدك للسما ويعلّي بيك
وإن حس غدرك ... أو غدر قلبك
ساعتها يرمي هواك في بير
فبلاش تطير ....
وما دمت عاجز عن فنون الطير
شوفلك سما تانية ...
وناس تانية ..
واتهجى بينهم ... أول دروس الطير
ولو عجزت وإنت ما بينهم
تعلا لما تطير
تعالي مدرستي ... ذاكر في كراستي
واعلم بإني السر ... وإن سري
جوه مني أسير
فعيشني بجنونك ....
عيشّني مكنونك ....
ولو قدرت تحل رمزي ...
حتخش قلبي
وجوه منه تطير
وساعتها بس حتبقى سري
ويبقى سري .... في بير...!!!
...............................................
قصيدة أول دروس الطير
من ديوانى (هلع الخوف)

أعجبني

أحببته

هاهاها

واااو

أحزنني

أغضبني