رائعة كليوباترا الشعر العربي إيزيس غانم .. ضباب الكذب

وفتحت ..للكلام أبواب..

قفلت مسامعك العاشقة..وردّتنى ..
مش إنت اللى الزمن حيرتك ..؟
نقشت ف مهجتى طيبتك ..وحبيتنى ..؟
وجاى دلوأت تتنكر لأشواقى ..
وأنا اللى ياما علمتك تكون سيد..
وتتباهى بقانون العشق ..
كأنك طير سماه قلبى ..وعشك كل أشيائى ..!!
ف ليه غيرت ..طبع الطير لطبع القط..
وبقيت ف العش خنّاقى ...
ف حاسب قبل ما تجرح ..
لأن ف ثورتى براكين ...
وقلبى إن بات حزين يجرح..
ويصنع م الجراح سكاكين ...!
ف لو كانت عيونك روح ..
أنا رافضه تكون روحى ...!
أنا جيتلك بغصن سلام ..
وأنقذتك من الطوفان ..
وصنّعت بشغاف قلبى سفينة حب ..
تعدى بيك من الضلمة ..من الأحزان ..
فاجئنى فيك ضباب روحك ..ضباب الكدب..
وأنا شمسى شروقها ما غاب ..!!
ورغم شروقى بفتح لك ف قلبى للكلام أبواب ...
لكين العتمه ف قلبك ..لغت سمعك وردّتنى ...!
مش إنت اللى الزمن حيرتك ..؟
نقشت ف مهجتى طيبتك ..وحبيتنى ..؟
ف ليه رديت ..البيبان وقسيت ..
وليه ف لحظه يا روحى نسيت ..؟
بإن صوابعى ف دروبك ..
كانت شمعه تقيد شمعه ..
وليلك يوم غياب قمرك..
كانت تبكى عينيك وتجف..
وعينى تسلفك دمعه ..!
نسيت الدمعه والشمعه ؟؟
نسيت إنى فكيانك كنت ..
يا روحى مدرسه وجامعه ..!
ف ليه سدّيت..
مسامع عشقك العاشق وردّيتنى ..؟
مش إنت اللى ف مدارى مشيت ..
ومن عطرى نويت تتوضى ...
وإتوضيت ..وصليتنى ....!!
ف ليه هديت ..كعبتى ونسيت..
بإنى البدء لبدايتك ..وإنك روح معدّيه..
وإنك جزء والأجزاء ...كمالها إكتمل بيّا ..!
سامحتك ياما وسماحى ..
غضب منى ..وثار فيّا..
طرد كدابك العاشق..
وحررنى من صنم عشقك..
ورجعلى النهار والشمس ..
ونبّت ريشى ف جناحى ..
وحرر منى عبوديه ...
ف طرت فى سما فرحى وأنا بضحك..
ف إيدى صك تحريرى ..
ورا ريشى رؤى ماتت ..وقدامى رؤى جايه..
كفرت بحبى ف نسيتك..
وسيبتك فى بيار كفرك ..
لقيت الشمس شيلانى على جناحها لحريه..!
فموت جواك وعيد موتك..
ما دام قلبك مع الخفافيش ..
شرب دم النهار والناس ..
كأنه بيشرب الميّه...
فصدقنى ما تلزمنيش ..
لأنى من جزور إنسان ..
لاكن إنت أبوك تعبان ..
فى صدره ..حاضن الحيّه...

......................
قصيدة \\ ضباب الكدب ..
إيزيس غانم ...