اللي تداوي جرحنا ..
وهي كاتمة جرحها.
اللي بتمسح دمعنا ..
وهي حابسه دمعها.
اللي تشيل ..
همّ الصّغير والكبير ..
ولا حد داري بهمها.
اللي بتروي عمرنا ..
بساتين حنان من حبها.
... مين زيَّـها ...
ييجي يتسحب بليل ..
ويدفي حضنك .
مين وانت قايم ..
يتنفض قلبه معاك ..
ويدادي قومتك.
مين ف احتمالها وصبرها ..
... مين زيَّـها ...
فاكر زمان ..
لما الوجع ..
كان يحزنك ..
يروي دموعك.
مين وقتها ..
طبطب عليك ..
ومسح عنيك ..
لملم جروحك.
فاكر يا واد ..
لما الألم ..
كان يهزمك ..
يكسر ضلوعك.
مين وقتها ..
كان الحنان ..
كان الأمان ..
من كل خوفك.
مين كل لحظة يشتهيك ..
يزرع حنانه بين ايدك ..
ينسى الوجود ..
لو حس جوعك.
مين كات تودع ضحكتك ..
وروحها تحرس خطوتك..
وتنتظر لحظة رجوعك.
مين كان يبات ..
جنبك حزين ..
لو تشتكي ..
ظلم السنين ..
تتوضى ترفع كفها ..
تدعي الكريم من قلبها ..
... مين زيَّـها ...
في الدنيا دي ..
مين زيَّـها.
ويوم الحساب ..
مين أدَّها ..
الجنة تحت رجلها ..
ورضا الإله ..
من بِرَّها ..
... مين زيَّـها ...
ليست هناك تعليقات:
إرسال تعليق